طبعا تنضيف القفص كل يوم بانك تشيل الدرج وتنضفه بالميه والصابون (مش شرط كامى او لوكس )الصابون السايل شغال او اريل او برسيل بس اهم حاجة تنضف كويس.
المسقه تتنضف كويس بالميه السخنه وتنضف مجرة الميه كويس .
ابعد عن المسق الفخار لان عصفورك مش هيخف من الاسهال .
طبعا كلنا عارفين ان العصفور بيشوف وبيحس وكل حاجة ياعنى عاملوه على انه كائن حى مش بيصوصو وخلاص .
فى عصافير زى الفيشر اول مابتجيبه مبيفكرش غير فى حاجة واحده ازاى يهرب من القفص علشان كده فى اختراع اسمه السوسته اللى بتركب فى الباب ياريت نركبها على كل باب فى القفص .
لازم تخوف العصفور من الباب من انه يقرب منه نعمل ايه لما تيجى تقفل الباب ارزعه جامد متقفلوش براحه والحركة دى تكررها على اد ما تقدر كده العصفور هيخاف من الباب واستحاله يقربله.
فى حاله شعور الطائر بالارهاق او انه كسلان ولا قادر يتحرك (خلصان من الاخر) ومعندكش فيتامين تعمل ايه هتحط ربع قرص كيبوريكس 500 فى المسقه لمده 3 ايام .
شوف عصفورك بيحب ياكل ايه وخليها وسيله تقربله بيها .
لو عاوز تسمى عصفورك اسم كرره قدامه كل ماتكون معاه.
طيب لو عاوز عصفورك ياكل من ايدك هتعمل ايه هتحط شويه اكل فى ايدك وتدخل ايدك القفص
وتسيب ايدك شويه متحركهاش خالص وهو هيكون خايف من ايدك فى الاول وبعدين واحده واحده هيقرب من ايدك وهياكل من ايدك وواحده واحده وانتا بدخل ايدك القفص هتكرر كلمه (كل) علشان يتعود عليها.
طبعا متنساش فى الصيف الدش اليومى للعصافير وتغير الميه اللى فى المسق على الاقل 3 مرات فى اليوم وتقدمله خس يكون مغسول كويس ومن غير متنشفه اه مش تبقى اعد جوه فى التكييف والعصفور بيتسلق بره .
وفى الحر النمل هيعيش حياته مع العصافير طيب نعمل ايه هتشيل العصافير من المكان اللى هما فيه وهتجيب مبيد اسمه ملاثيون
ده بقى جبار ملهوش حل هتحط شويه فى الميه وهترش بيه المكان اللى العصافير بيكونوا فيه كويس وتمسح الارض برضه بيه وتسيب المكان يتهوه شويه وترجع العصافير وابقى قابلنى لو شوفت نمله قبل الصيف اللى بعده
اي خدعه يا جدعان
موضوع: نصائح اولية لضمان سلامة الطائر وانه يفضل فى القفص وميسبكش ويطير. 
الأربعاء يوليو 15, 2009 9:15 pm
